Sisikaping sagipin ni Labor Secretary Silvestre Bello III ang isa pang Overseas Filipino Worker (OFW) na nakalinyang bitayin sa Kuwait.
Positibo si Bello na masasagip niya sa parusang bitay si Elpidio Nano na nahatulan ng parusang kamatayan noong 2008 dahil sa pagpatay sa kanyang katrabaho at kapwa Pilipino na si Engineer Nilo Macaranas.
Ayon kay Bello, may malaki ang porsyentong magtagumpay ang negosasyon sa pagitan ng pamilya nina Nano at Macaranas dahil parehong Pilipino ang mga ito.
Bukod sa kanyang misyon na sagipin si Nano, dadalawin rin ni Bello ang pinaglibingan kay Jakatia Pawa, ang Pinay na kamakailan lamang binitay sa Kuwait.
Kakausapin rin umano ni Bello ang mga labor attaches sa Middle East upang hingin ang listahan ng mga OFW’s na nakakulong lalo na ang mga nasa death row.
By Len Aguirre
