Patay ang isang Overseas Filipino Worker (OFW) matapos sunugin sa loob mismo ng kaniyang bahay sa Johor Bahru, Malaysia.
Nakilala ang 35-anyos na biktima na si Ruby Lloren mula sa Polomolok, South Cotabato at nagtatrabaho bilang service crew sa isang fastfood chain.
Ayon kay Sheila, kapatid ng biktima, tinawagan sila ng mister ni Ruby na isang Malaysian national noong Martes ng hapon, mismong araw ng insidente.
Sinasabing wala ang asawa ng biktima nang umuwi ito mula sa trabaho at may nanloob sa kanilang apartment.
Ipinabatid naman ng ina ng biktima na si Virginia na lumalabas sa autopsy na nagpapakitang nilason muna ang Pinay bago sinunog.
Nabatid na iniuwi ni Ruby sa kaniyang apartment ang perang ipapadala sana niya sa kaniyang pamilya sa Pilipinas.
Tumanggi naman ang pamilya ni Ruby na pangalanan ang mister ng Pinay na pitong taon na nitong kinakasama.
Tutulak pa Malaysia ang pamilya ni Ruby para sa DNA testing at makumpirmang ang Pinay nga ang nasabing biktima.
By Judith Larino
