Nanawagan ang pamilya ng pinatay na Overseas Filipino Worker o OFW sa Kuwait na si Joanna Demafelis na patawan ng parusang bitay ang nahuling suspek sa pagpatay ng kanilang kaanak.
Sinabi ni barangay kagawad Pablo Demafelis, tiyuhin ni Joanna, na nais nilang bitayin sa harap ng publiko ang amo ng kanyang pamangkin na naaresto ng Interpol sa Lebanon na si Nadder Essam Assaf.
Ayon pa kay Pablo, magkahalong emosyon ang nararamdaman ng pamilya nila ngayon kung saan nagagalak sila sa pagkahuli kay Assaf pero mas nangingibabaw pa rin aniya ang galit sa kanila dahil sa malagim na sinapit ni Joanna.
Nagpapasalamat naman ang pamilya demafelis sa mabilis na pagkakahuli sa suspek at sana aniya ay matunton na rin ang among babae ni Joanna.
Recruitment agency ng Pinay OFW pananagutin
Tiniyak naman ni Labor Secretary Silvestre Bello III na mananagot sa batas ang recruitment agency ng pinatay na Pinay OFW sa Kuwait na si Joanna Demafelis.
Ayon kay Bello, sa ilalim ng umiiral na batas ay ‘civilly and administratively liable’ ang ahensya na nagpaalis kay Demafelis.
Giit ni Bello, dapat na minomonitor ng mga ‘recruitment agencies’ ang kalagayan ng mga manggagawa na kanilang ipinadadala sa abroad.
Tiniyak din ni Bello na ibibigay lahat ng pamahalaan ang tulong para sa pamilya ni Demafelis batay na rin sa kautusan ni Pangulong Rodrigo Duterte.
—-