Nagkasa ng isang job fair ang Department of Labor and Employment (DOLE) bilang bahagi ng pagdiriwang ng ika-tatlumpu’t tatlong anibersaryo ng EDSA People Power Revolution ngayong araw.
Ayon kay Labor Secretary Silvestre Bello III, nasa dalawampu’t isang libong (21,000) mga trabaho ang kanilang iniaalok mula sa iba’t ibang kumpanya at ahensiya ng pamahalaan.
Kaisa anila sa isinasagawang TNK o Trabaho Negosyo Kabuhayan Job and Business Fair ang Departments of Trade and Indrustry, Transporation, Public Works and Highways at maging ang Go Negosyo.
Bukod dito, sinabi ng Philippine Overseas Employment Administration (POEA), nasa labing dalawang libong (12,000) mga trabaho sa ibang bansa tulad ng Amerika, Malaysia, Australia, Germany, Japan at iba pa ang iniaalok ng labinglimang (15) mga recruitment agencies na nakiisa rin sa naturang job fair.
Ginaganap ang Trabaho Negosyo Kabuhayan Job and Business Fair sa Starmall sa Mandaluyong City.
“We have about siguro around 21,000 na job openings para sa ating mga kababayan na gustong mag-trabaho, iba-ibang klase merong mga caregivers, manufacturers, construction workers, overseas workers, nurses, teachers, andiyan po lahat, samantalahin natin ang pagkakataon magtungo na po kayo sa Star Mall at mag-apply for job, inaasahan nating maraming matatanggap ngayon. ” Pahayag ni Bello
(Ratsada Balita Interview)
