INIUGNAY ni dating Cong. Ace Barbers ang sunod-sunod na paratang laban kay dating House Speaker Martin Romualdez sa tinawag niyang “hit or miss” demolition job na umano’y sinimulan ni retired Sgt. Orly Regala Guteza sa isang pagdinig ng Senate Blue Ribbon Committee. Ayon kay Barbers, dating pinuno ng House Quad Committee, malinaw ang pattern ng mga walang basehang akusasyon na tila bahagi ng isang organisadong kampanya ng paninira upang sirain ang kredibilidad ng dating Speaker. Tinukoy niya na ang biglaang paglitaw ni Guteza sa pagdinig ng Senado noong Setyembre 25, 2025, ang naging mitsa ng mga sunod-sunod na ulat at walang beripikasyong pahayag na tumatarget kay Romualdez. Si Guteza, na nagpakilalang dating sarhento ng Philippine Marines, ay nagsabing siya at ilang kasamahan umano ay personal na naghatid ng ilang maleta ng salapi sa mga tirahan nina Romualdez at Cong. Zaldy Co. Mariing itinanggi ito ni Romualdez, tinawag na pekeng akusasyon at malisyosong gawa-gawa, at iginiit na walang naganap na ganitong paghahatid ng pera. Pinuna rin ng legal team ni Romualdez ang pagiging kuwestiyonable ng sinumpaang salaysay ni Guteza dahil sa mga hindi nagtutugmang petsa at pangyayari — kabilang na ang impormasyong walang nakatira sa bahay ng mga Romualdez noong panahong sinasabing naganap ang insidente dahil sumasailalim pa ito sa pagkukumpuni. Dahil dito, nanawagan si Barbers sa mga imbestigador, kabilang ang Senate Blue Ribbon Committee, na maging maingat sa pagtanggap at paggamit ng mga testimonya na walang sapat na ebidensya. Matapos ang kanyang biglaang pagharap sa Senado, hindi na muling sumipot si Guteza sa Department of Justice upang patotohanan ang kanyang mga alegasyon at tuluyang nawala sa publiko mula noon. Kasabay nito, napansin ni Barbers na nagsulputan din ang mga ulat na nag-uugnay kay Romualdez sa umano’y iregularidad sa mga farm-to-market road project sa Tacloban, pati na rin ang pagpakalat ng pekeng balita na ginagawang state witness ang dating Speaker. Noong Setyembre, lumabas ang mga ulat tungkol sa umano’y overpricing sa mga proyektong farm-to-market road sa Leyte na sinasabing sakop ng impluwensiya ni Romualdez. Gayunman, nilinaw ni Agriculture Secretary Francisco Tiu Laurel Jr. na ayon sa internal audit ng kagawaran, maayos at walang “ghost” o substandard roads na natukoy sa mga naturang proyekto. Katulad ni Barbers, pinuna rin ni Deputy Speaker Ronaldo Puno ang kahina-hinalang timing ng mga alegasyon at sinabing ito ay bahagi ng isang sabayang demolition campaign laban sa dating Speaker. Dagdag pa rito, ilang social media post ang nagpalaganap ng maling impormasyong ginagawang state witness si Romualdez kaugnay ng imbestigasyon sa flood-control projects. Agad itong pinabulaanan ng DOJ, na nagsabing hindi kailanman nag-apply o isinasaalang-alang si Romualdez para sa anumang witness protection o testimonial immunity. Tinawag ni dating Justice Secretary at ngayo’y Ombudsman Jesus Crispin Remulla na “misinformation” ang naturang mga post at nilinaw na walang ganitong usapan sa loob ng DOJ. Ayon kay Barbers, malinaw na layunin ng mga pekeng balitang ito na ipahiya si Romualdez at bigyang kredibilidad ang mga paratang na walang sapat na patunay. Binigyang-diin niyang dapat ay nakabatay sa beripikadong katotohanan ang mga pampublikong talakayan at hindi sa orchestrated propaganda na sumisira sa tiwala ng publiko at sa reputasyon ng mga indibidwal nang walang due process. Kaugnay nito, nagpahayag din ng kaparehong panawagan si Makati Business Club Executive Director Rafael “Apa” Ongpin, na hinimok si Pangulong Ferdinand Marcos Jr. na manatiling patas sa paghahanap ng katotohanan at pananagutin lamang ang mga tunay na responsable sa mga isyung may kinalaman sa mga proyektong pampubliko, partikular sa flood control. Sa kasalukuyan, wala pang alinmang opisyal na ahensya — maging ang Senado, Department of Agriculture, o DOJ — ang nagpatibay ng alinman sa tatlong isyung ito: ang “hit or miss” Senate testimony ni Guteza, ang mga farm-to-market road allegations, at ang isyung state witness — na pawang nananatiling walang matibay na batayan.
