Palalawakin ng Department of Health ang zero-balance billing na hindi na lamang limitado sa mga ospital na pinapatakbo ng kagawaran.
Ayon kay Health Secretary Teodoro Herbosa, ito’y matapos aprubahan ng Senado ang karagdagang pondo sa panukalang General Appropriations Bill.
Sa oras na tuluyang maaprubahan ang panukala, gagamitin ang dagdag na isang bilyong pisong pondo para suportahan ang mga level 3 hospitals na pagmamay-ari ng mga local government units.
Ayon sa DOH, may mga kondisyon ang pagpapatupad nito kabilang ang sapat na accreditation ng mga rural health units sa PhilHealth Yakap Program at saklaw ng mga pasyente.
Dagdag pa ng DOH, iaayon ang pondo sa populasyon, pasilidad, at uri ng LGU, at ilalabas sa mga level 3 hospitals sa ilalim ng isang legal agreement.
Sa kasalukuyan, mahigit isang milyong Pilipino na ang nakinabang sa zero-balance billing program sa buong bansa.
