Bigong maka-usad sa Kamara ang panukalang i-override o baligtarin ang pag-veto o pagbasura ni Pangulong Noynoy Aquino sa proposed P2,000 increase sa monthly pension ng mga retiradong miyembro ng Social Security System (SSS).
Ito’y makaraang mag-adjourn ang Kamara sa huling sesyon kagabi nang hindi pinagbobotohan ang nasabing panukala.
Mag-aalas-8:00 nang i-adjourn ang sesyon kahit pa umapela si Bayan Muna Partylist Rep. Neri Colmenares na ipagpatuloy ang proceedings sa kanyang resolusyon na pagbotohan nilang mga kongresista ang pag-override ang veto ni Pangulong Aquino sa SSS pension hike bill.
Hindi rin nakapagbigay ng closing remarks si House Speaker Feliciano Belmonte Junior.
Maliban sa panukalang pag-override sa veto ni PNoy sa SSS pension hike, hindi na rin natalakay sa pagsasara ng sesyon ang Freedom of Information (FOI) Bill at Bangsamoro Basic Law (BBL).
Seniors
Iprinotesta naman ng ilang senior citizen at miyembro ng militanteng grupo ang kabiguan ng Kamara na i-override ang pag-veto ni Pangulong Noynoy Aquino sa panukalang P2,000 peso pension hike para sa mga retiradong miyembro ng SSS.
Umalingawngaw ang sigawan at hiyawan ng mga senior citizen sa House Gallery matapos mag-adjourn ang Kamara sa huling sesyon kagabi nang hindi pinagbobotohan ang nasabing panukala.
Iginiit ng mga demonstrador na dapat pagbotohan ng mga kongresista ang resolusyong i-override o baligtarin ang desisyon ng Pangulo na nagbasura sa SSS Pension Hike Bill.
Napaluha naman si Bayan Muna Partylist Rep. Neri Colmenares, main author ng SSS Pension Hike Bill sa kabiguan ng Kamara na pagbotohan ang veto ng Pangulo.
By Drew Nacino