Umaasa ang Liga ng Transportasyon at Operators sa Pilipinas (LTOP) na aaprubahan ng Land Transportation Franchising and Regulatory Board (LTFRB) ang petisyon para sa surcharge ng mga jeep at bus tuwing rush hour.
Sa panayam ng DWIZ, binigyang diin ni Orlando “Ka Lando” Marquez Sr., National President ng LTOP, na kailangang maaprubahan ito dahil sa aberyang idinudulot ng matinding traffic sa mga tsuper.
Iginiit pa ni ka Lando na umaaray na rin ang mga drayber sa patuloy na pagtaas ng presyo ng produktong petrolyo kung saan, halos dito na lamang napupunta ang kanilang kinikita sa pamamasada.
Sa susunod na taon pa aasahan ang desisyon ng LTFRB kung aaprubahan o ibabasura ang petisyon para sa surcharge kung saan, piso ang idaragdag sa pasahe sa jeep, habang dalawang piso sa bus, simula ala-5:00 hanggang alas-8:00 ng umaga, at alas-4:00 ng hapon hanggang alas-8:00 ng gabi, maliban tuwing linggo at national holiday.