Nananawagan ng transparency si Vice President Leni Robredo matapos na maunang mabakunahan ang ilang miyembro ng Presidential Security Group (PSG) gamit ang hindi awtorisadong COVID-19 vaccine.
Ayon kay Robredo, dapat maimbestigahan ang ginagawang pagpapabakuna sa mga mieymbro ng PSG dahil hindi ito dumaan sa regular na proseso na itinatakda ng mga ahensiya ng pamahalaan.
Aniya, hindi dapat palampasin ang pangyayari dahil nanghihimok lamang ito sa mga tao na gumawa rin ng mali lalu na’t wala namang nakikitang naparurusahan.
Dagdag ni Robredo, hindi nakatutulong sa bansa na ang mga malalapit pa sa pangulo ang mismong lumalabag sa mga umiiral na protocols at batas.
Kinuwestiyon din ng pangalawang pangulo kung bakit hindi nasunod ang listahan ng ipa-priority ng pamahahalaan pagdating sa bakuna kung saan nangunguna dapat ang mga health workers.
Iginiit ni Robredo, kanyang kinikilala na dapat isa sa prayoridad ang mga uniformed personnel lalu na ang mga nakapaligid sa pangulo pero nakapagtataka aniyang hindi nasunod ang panuntunan sa bakuna.
