Ikinakasa na ng Bureau of Fisheries and Aquatic Resources ang tatlong buwang ban sa panghuhuli ng isdang tawilis sa Taal Lake sa Batangas.
Ayon kay BFAR Director Ed Gongona, posibleng simulan ang three-month fishing ban sa Marso o Abril matapos ideklara ng International Union for the Conservation of Nature ang Tawilis o Sardinella Tawilis bilang endangered species.
Noon pa anyang taong 2013 nila inirerekomenda ang tatlong buwang fishing ban subalit hindi sila pinakinggan ng Department of Environment and Natural Resources.
Isa sa mga sinasabing dahilan upang bumaba ang bilang ng tawilis ay ang overfishing lalo’t ginagamit na rin ang naturang isda bilang processed food na ine-export o ginagawang sardinas.
Ang tawilis ang kaisa-isang freshwater sardine sa mundo na matatagpuan lamang sa Taal Lake.
