Inaasahang tatagal ng isang oras at tatlumpung minuto ang ikalimang State of the Nation Address (SONA) 2026 ni Pangulong Ferdinand Marcos Jr.
Ito ang sinabi ni House Majority Leader Sandro Marcos sa ambush interview matapos ang pagbubukas ng 2nd Regular Session sa plenaryo ng Kamara.
Ayon kay Marcos, nais ni Pangulong Marcos na mapanatili sa isang oras at kalahati ang kaniyang talumpati upang hindi mainip o mabaling ang atensyon ng publiko.
Aniya, hahayaan at hindi siya makikibahagi sa kabuuang mensahe ng Pangulo sa taumbayan.
Inaasahang ilalatag ng Pangulo ang mga prayoridad na panukalang tutugon sa pangangailangan ng mga Pilipino.
Kasabay nito, tiniyak ng Majority Leader na ipagpapatuloy ng Kamara ang momentum nito sa pagpasa ng mga prayoridad na panukala, partikular ang mga panukalang bahagi ng Legislative-Executive Development Advisory Council (LEDAC).
Nabatid na 26 sa 52 LEDAC priority measures ang naipasa na ng Kamara, at target nilang maaprubahan ang mga natitirang panukala sa mga susunod na sesyon ng Kamara.
Bukod pa dito, inaasahan din ng House leadership na maisusumite sa Kongreso sa susunod na buwan ang panukalang 2027 National Expenditure Program, na magsisilbing batayan sa pagtalakay at pag-apruba ng pambansang budget para sa susunod na taon. | via Geli Mendez (Patrol 30)
