Pinaghahain din ng isang pribadong indibidwal si Solicitor General Jose Calida ng Quo Warranto petition laban kay Supreme Court Associate Justice Teresita de Castro.
Sinabi ni Jocelyn Marie Acosta na dapat gawing basehan ni Calida ang ginamit nitong rason sa naunang petisyon na inihain laban kay on leave Chief Justice Maria Lourdes Sereno.
Ayon kay Acosta, 25 SALN lamang ang naisumite ni De Castro mula sa 39 na dapat nitong ipinasa.
Maaari pa aniyang kasuhan ng perjury si de Castro nang banggitin sa pagdinig ng House Committee on Justice na nakumpleto niya ang lahat ng requirements na hiningi ng JBC.
Magugunitang ang kabiguan umano ni Sereno na maghain ng ilan sa kanyang SALN ang dahilan ni Calida sa isinampang quo warranto petition.