Sanib pwersa nang iniimbestigahan ng Philippine National Police (PNP) gayundin ang National Bureau of Investigation (NBI) ang kaso ng pamamaril sa Customs Lawyer na si Atty. Joseph Samuel Zapata.
Kasunod nito, kinumpirma ni PNP Spokesperson, P/Col. Jean Fajardo na bumuo na ng Special Investigation Task Group (SITG) ang Criminal Investigation and Detection Group (CIDG) na siyang nakatutok sa kaso.
Magugunitang tinambangan si Zapata habang sakay ng kaniyang puting SUV ng 2 salaring magka-angkas sa motorsiklo habang binabagtas ang bahagi ng Macapagal blvd. sa Pasay City nuong Lunes.
Kaugnay nito, sinabi ni Fajardo na batay sa isinagawang cross-matching sa mga bala ng baril na nakuha sa lugar kung saan binaril si Zapata ay nagtugma naman ito sa 9mm na baril na ginamit din sa 2 pang insidente ng pamamaril sa Rizal nuong Enero a-7, Enero a-14 at Pebrero a-11.
Dahil dito, mahigpit na tinututukan ani Fajardo sa isinasagawang imbestigasyon na may kinalaman sa trabaho ni Zapata bilang customs lawyer ang motibo sa krimen. —ulat mula kay Jaymark Dagala (Patrol 9)
