Inatasan ng Department of Education ang lahat ng pampublikong paaralan sa buong bansa na gawing simple at tipid ang mga magiging graduation at moving-up ceremonies ngayong taon.
Ito’y kasunod pa rin ng pagtaas ng presyo ng langis na nagdudulot ng dagdag gastos sa mga pamilya.
Sa ilalim ng DepEd Memorandum Number 015, ipinagbabawal ang labis na paggastos, kabilang ang magagarang kasuotan at anumang kontribusyon o bayarin para sa naturang seremonya.
Ayon kay Education Secretary Sonny Angara, layunin ng hakbang na mabawasan ang pinansyal na pasanin ng mga magulang habang ipinagdiriwang ang tagumpay ng mga mag-aaral.
Samantala, pinapayuhan din ang mga paaralan na idaos ang seremonya sa mga simpleng lugar lamang tulad ng mga school grounds o covered court.
Nilinaw din ng DepEd na hindi dapat gawing requirement sa graduation ang mga non-academic activities tulad ng field trips at prom.
