Mariing itinanggi ni dating Supreme Court Chief Justice Maria Lourdes Sereno na bahagi na siya ng grupong Tindig Pilipinas na binuo ng oposisyon.
Sa kaniyang pagdalo sa pagtitipon ng grupo sa UP Bahay ng Alumni kasabay ng pagdiriwang sa Araw ng Kalayaan kahapon, iginiit nitong naimbitahan lamang siya sa nasabing aktibidad.
Bagama’t nagpahiwatig si Senador Bam Aquino na siyang nagpakilala kay Sereno sa pagtitipon hinggil sa posibleng pagtakbo nito sa pagka-Senador sa ilalim ng partido Liberal sa 2019, tahimik naman dito ang dating punong mahistrado.
Kasunod nito, nanindigan si Sereno na itutuloy ng kaniyang kampo ang laban sa Senado pero nilinaw nito na ang ibig sabihin niyo’y ang paggigiit nila na idaan sa impeachment court ang pagpapatalsik sa kaniya sa puwesto.
