Inirekomenda ng NAPOLCOM o National Police Commission kay Pangulong Rodrigo Duterte na bigyan ng Medal of Valor ang 42 miyembro ng Special Action Force o SAF na nasawi sa kasagsagan ng Mamasapano operation.
Ayon kay NAPOLCOM Vice Chairman Rogelio Casurao, nararapat lang na gawaran ng medalya ng kagitingan o Medal of Valor ang lahat ng SAF 44 dahil sa kanilang kabayanihang ipinalamas sa serbisyo.
Matatandaang noong administrasyong Aquino, dalawa lamang sa SAF 44 ang nabigyan ng Medal of Valor.
Habang ang 42 iba pa ay nakatanggap lamang noon ng medalya ng kabayanihan o Philippine National Police (PNP) distinguished conduct medal.
Sa ilalim ng Republic Act No. 9049, makatatanggap ng P75,000.00 lifetime monthly pension ang Medal of Valor awardees, bukod pa sa ilang insentibo at pribilehiyo.
By Meann Tanbio | With report from Jonathan Andal