Kapwa nagkasundo ang Armed Forces of the Philippines (AFP) at ang Philippine National Police (PNP) na manahimik na muna habang gumugulong ang imbestigasyong ikakasa ng National Bureau of Investigation (NBI).
Ito’y may kaugnayan sa nangyaring engkuwentro sa pagitan ng mga pulis at sundalo sa Sitio Marina, Brgy. Walled City Sa Jolo, Sulu kahapon ng hapon.
Ayon kay AFP Spokesman B/Gen. Edgard Arevalo, ang tanging hangad lamang nila ay magkaroon ng patas at independyenteng imbestigasyon kaya nila napagpasyahang hingin ang tulong ng NBI hinggil dito.
Pagtitiyak pa ng heneral, magkatuwang ang AFP at PNP sa kanilang maigting na kampaniya kontra terrorismo gayundin sa pagharap sa pandemya ng COVID-19 kaya’t mananatili itong buo at matatag.
Welcome din aniya sa AFP ang nanging hakbang ng Police Regional Office – Bangsamoro Autnomous Region na dis-armahan at isailalim sa protective custody ang mga tauhan ng Jolo Municipal Police na sangkot sa insidente.
Sa huli, tiniyak ni Arevalo ang buong suporta at pakikiisa sa imbestigasyon gayundin ang angkop na tulong sa pamilya ng mga napaslang na sundalo.