Umapela ang Philippine National Police (PNP) sa lahat na igalang ang itinatakbo ng imbestigasyon kaugnay sa pagkawala ng may 34 na mga sabungero.
Ayon kay PNP Spokesperson, P/Col. Jean Fajardo, mahigpit ang naging babala ni PNP Chief, P/Gen. Dionardo Carlos sa lahat ng mga Pulis na mapatutunayang sangkot dito na hindi sila sasantuhin at tiyak na pananagutin sa batas.
Una nang sinibak sa puwesto ang Provincial Director ng Laguna PNP na si P/Col. Rogarth Campo bunsod ng paratang na nag-alok umano ito para ligpitin ang mga nawawalang sabungero.
Gayundin ang akusasyon sa kaniya ng gambling lord na si Charlie Atong Ang na tumanggap umano si Campo ng P1M mula sa kaniya.
Maliban kay Campo, nasa floatng status na rin ang 3 pang Pulis na positibong itinuro ng pamilya ng ilang sabungero na dumukot sa kanilang ka-anak sa pagpapatuloy ng pagdinig ng Senado hinggil dito.
Magugunitang ipinanawagan ni Sen. Christpher Lawrence Bong Go ang pagpapatigil sa PNP na magsagawa ng kanilang imbestigasyon dahil pawang mga kabaro nila ang sangkot, bagay na kinontra naman ni Sen. Koko Pimentel. – ulat mula kay Jaymark Dagala (Patrol 9)