Nagbabala ang PNP-Highway Patrol Group na bilang na ang araw ng mga bumibiyaheng tricycle sa mga pangunahing kalsada partikular sa EDSA.
Ito’y ayon kay PNP Highway Patrol Group OIC S/Supt. Arnold Gunnacao ay dahil sa kanila na ring huhulihin ang mga pasaway na tricycle simula sa lunes upang mapaluwag ang nararanasang matinding trapik.
Aminado si Gunnacao na bagama’t mahigpit na ipinagbabawal ang mga tricycle sa mga major thoroughfares, hindi naman aniya ito maipatupad dahil sa kaunting bilang ng mga enforcers kumpara sa dami ng mga tricycle operators at drivers.
Paglilinaw pa ni Gunnacao, batid nila ang ginagawang hanapbuhay ng mga pumapasada ng tricycle ngunit nais lamang nilang ilagay sa ayos ang lahat.
Kasunod nito, nakikipag-ugnayan na ang PNP-HPG sa mga lokal na pamahalaan gayundin sa tricycle regulatory unit upang samahan sila sa pagbabantay at panghuhuli.
By Jaymark Dagala
