Inilatag ni presidential candidate Ferdinand ‘Bongbong’ Marcos Jr. Ang plano ng kanilang Uniteam para mapababa ang singil sa kuryente kung saan, isa sa malaking bahagi ng sahod ng isang manggagawa ay napupunta lamang sa pagbabayad ng bill sa kuryente.
Layunin ng Uniteam na magkaroon ng sapat, maasahan at abot kaya na kuryente para sa bawat isa kung saan, sakaling manalo ang BBM-SARA Uniteam, kanilang tututukan ang produksyon, transmisyon at distribusyon ng kuryente sa bansa.
Plano din ng Uniteam na paramihin ang energy resources sa bansa para masigurong hindi na kakapusin ng supply tulad nang pagpaparami ng mga geothermal at hydroelectric power plant maging ang mga solar at wind power sources na malaking tulong din para mapababa ang presyo ng kuryente.
Sinabi ni Marcos na isa rin sa dapat pagtutuunan ng pansin ng pamahalaan ang pagsusulong sa paggamit ng “large scale battery storage” para ma-preserba at hindi kapusin ng enerhiya o kuryente.
Iminumungkahi rin ni Marcos ang pag-aaral para buhayin ang nuclear power plant na nauna nang itinayo ng kanyang ama na si dating presidente Ferdinand Marcos Sr.
Base sa pinakahuling survey, 79% ng mga Pilipino ang payag sa rehabilitasyon ng bataan nuclear power plant, 65% naman ang payag na magpatayo ng bagong power plant habang 78.8% naman ang bukas para pag-aralan ang mga impormasyon ukol sa power plant.