Masusing aalamin ng Senate Committee on Local Government kung ano ang plano upang mabigyang garantiya na mapoprotektahan ang kapakapanan ng mahigit 36,000 public servant sa Autonomous Region in Muslim Mindanao (ARMM) na maaaring maapektuhan sa oras na aprubahan ang Bangsamoro Basic Law (BBL).
Ito, ayon kay Committee Chairman Bongbong Marcos, ang tututukan ng ipatatawag niyang pagdinig hinggil sa BBL ngayong araw.
Iginiit ni Marcos na nais niyang malaman kung maayos at kumpleto ang sinasabi ng Office of the Presidential Adviser on the Peace Process (OPAPP) na plano para sa mga maaapektuhang ARMM employee kapag nilikha ang Bangsamoro region.
Sinasabi, aniya, ng OPAPP na mayroon ng inorganisang transition team para gumawa ng plano para sa mga ARMM employee na maaaring mawalan ng trabaho o mag-early retirement.
Nais din ng senador na matiyak na matutugunan ang lahat ng “concern” ng mga major stakeholder at mga maaapektuhan bago gawin ang committee report kaugnay sa BBL.
By Cely Ortega-Bueno / Drew Nacino