Bumulusok sa pinakamababang halaga ang piso kontra sa dolyar sa nakalipas na 12 taon.
Ito ayon sa experts ay epekto ng pahayag ng North Korea na bukas itong maresolba ang mga usapin sa Amerika sa isyu ng nuclear weapons sa kabila ng pagkansela ni US President Donald Trump sa summit meeting kay NoKor leader Kim Jong Un.
Rumehistro sa P52.70 ang closing rate sa huling araw ng trading week kumpara sa P52.55 noong Huwebes.
Ang nasabing closing rate ay pinakamababa mula sa naitalang P52.745 na halaga ng piso kontra sa dolyar noong July 19, 2006.
Sinabi ni Guian Angelo Dumalagan, market economist ng Land Bank of the Philippines na tumalon ang halaga ng dolyar sa huling bahagi ng trading matapos tiyakin ng NoKor ang kahandaan pa ring ituloy ang pulong sa Amerika.
Bahagya pa aniyang humina ang dolyar dahil sa profit taking matapos kanselahin ni Trump ang June 12 summit meeting sa NoKor.
—-
