Dismayado ang Kamanggagawa Party-list sa naging laman ng ikalimang State of the Nation Address (SONA) 2026 ni Pangulong Ferdinand Marcos Jr., dahil hindi umano nito nabigyang prayoridad ang kapakanan ng mga manggagawang Pilipino.
Ayon kay Kamanggagawa Party-list Rep. Eli San Fernando, binalewala ni Pangulong Marcos sa kaniyang talumpati sa SONA ang mga panukalang batas na magtataas sa sahod ng mga manggagawa sa buong bansa.
Gayundin ang pag-alis ng provincial wage rates, at tuluyang wakasan ang endo o labor-only contracting upang matiyak ang seguridad sa trabaho.
Aniya, ang mga ito ang matagal nang pangunahing isinusulong ng kanilang partido para sa sektor ng paggawa.
Pinuna rin ni San Fernando ang pananatili sa “Ayuda Nation” ng Pilipinas dahil mas inuuna umano ng pamahalaan ang pamimigay ng panandaliang ayuda at pautang kaysa sa pagbibigay ng disenteng sahod sa mga manggagawa.
Gayunman, tiniyak ni San Fernando na suportado nila ang planong itaas ang income tax exemption sa sahod at alisin ang system loss charges na ipinapatong sa singil sa kuryente.
Umaasa ang mambabatas na isusulong ng administrasyon ang pagtanggal o pagbabawas ng value-added tax o VAT sa mga produktong petrolyo, na aniya’y direktang makapagpapababa sa presyo ng mga pangunahing bilihin, petrolyo, at gastusin ng mga manggagawa. | via Geli Mendez (Patrol 30)
#DWIZ #DWIZNews #DWIZ882AM
