Muling ginisa ng mga senador ang kontrobersyal na panukulang Maharlika Investment Fund o MIF.
Kinuwestiyon ni Senate Minority Leader Sen. Koko Pimentel ang pangangailangang sertipikahang urgent ang MIF.
Binasa ni Pimentel ang isang probisyon ng konstitusyon o ang Section 26, Paragraph 2 ng Article 6, kung saan ipinapaliwanag kung kailan lamang maaaring sertipikahang urgent ng pangulo ang isang panukalang batas.
Kabilang sa mga kinuwestyon sa Plenary Session si Senador Mark Villar, sponsor ng bill at iginiit na si Pangulong Ferdinand Marcos Jr. ang mas naka-aalam kung anong emergency meron ang bansa kaya nito sinertipikahang urgent ang panukala.
Aminado siyang hindi magiging immediate ang solusyon sa problema ng kahirapan o poverty sa bansa.
Tinanong naman ni Pimentel kung ano ba talaga ang Maharlika Investment Corporation at inihayag ni Villar, isang GOCC ang MIC na maituturing aniya bilang isang “special vehicle for investment”.
Pero tanong ni Pimentel, kung hindi naman pala bangko ang MIC ay bakit dinala ito sa Senate Committee on Banks.