Personal na pinangunahan ni Pangulong Ferdinand Marcos Jr. ang pagbubukas ng klase sa Epifanio Delos Santos Elementary School sa Malate, Maynila, bilang hudyat ng opisyal na pagbabalik-eskuwela.
Sa kanyang virtual na mensahe sa mga paaralan sa buong bansa, nagpahayag ang Pangulo ng pag-asa na naging maayos ang pagbubukas ng klase para sa mga mag-aaral, guro, at magulang. Binigyang-diin niya ang paggamit ng whole-of-government approach upang matiyak ang ligtas at epektibong academic year, sa tulong ng mga ahensiyang tulad ng DSWD, DTI, DICT, at PNP.
Muling tiniyak ng Pangulo ang pagtutok ng kanyang administrasyon sa pagpapabuti ng kalidad ng edukasyon, kabilang ang pagkuha ng 20,000 karagdagang guro at dagdag na kawani upang mapagaan ang trabaho ng mga tagapagturo. Hinikayat din niya ang mga paaralan na makipag-ugnayan sa mga lokal na pamahalaan at DepEd para sa kanilang mga pangangailangan.
