Mariing itinanggi ng Malakanyang na binabalewala nila ang kontrobersya ng tanim bala sa NAIA.
Sinabi ni Presidential Spokesman Edwin Lacierda na nais makita ni Pangulong Noynoy Aquino ang puno’t dulo ng problema kaya’t masusing pinaiimbestigahan ito.
Ito aniya ang dahilan kung bakit nagpatawag ng pulong sa DOTC para maberipika at ma-validate ang mga lumalabas na impormasyon.
Binigyang diin ni Lacierda na patunay na concern ang pangulo sa naturang kontrobersya nang sa gayon ay hindi na maulit ang ganitong insidente.
Nakiusap din ang Malakanyang sa mga netizens at mga kritiko na maghintay sa ilalabas na resulta ng imbestigasyon ng Department of Transportation and Communication o DOTC hinggil sa laglag bala modus sa NAIA sa loob ng linggong ito.
Sinabi ni Presidential Spokesman Edwin Lacierda na naiintindihan ng gobyerno ang pag-aalala ng publiko at kumikilos na aniya ang mga kinauukulang ahensya para matukoy ang puno’t dulo ng problema.
Nauna rito, binatikos ng mismong kilalang supporters ng administrasyon ang pagiging insensitive ng gobyerno dahil mga inosenteng sibilyan na nabibiktima ng mga nasa likod ng laglag-bala o tanim-bala.
Hindi naman ikinasama ng loob ni Lacierda ang batikos ng kanilang supporters sa pagsasabing may demokrasya sa bansa at malaya ang sinuman na maghayag ng kanilang opinyon.
By Meann Tanbio | Aileen Taliping (Patrol 23)
