Tinawag na fake news ni Department of National Defense Sec. Delfin Lorenzana ang mga kumakalat na balita partikular na sa social media.
Kaugnay ito sa umano’y posibleng muling pagsasailalim sa Metro Manila sa mas mahigpit na modified enhanced community quarantine (MECQ).
Ito’y matapos na makapagtala ang Department of Health (DOH) ng mahigit 2,000 bagong kaso sa nakalipas na mga araw.
Ayon kay Lorenzana, mananatili sa general community quarantine (GCQ) ang Metro Manila hanggang sa katapusan ng taon dahil wala namang rekumendasyon mula sa Inter – Agency Task Force (IATF) at Metro Mayors para palitan ang umiiral na quarantine status.
Kasunod nito, muling nanawagan sa publiko si Lorenzana na makibalita lamang sa mga lehitimong source at makabubuting sumunod sa ipinatutupad na health protocols lalo na ngayong panahon ng Kapaskuhan.
