Isinusulong ngayon sa mababang kapulungan ng kongreso ang panukalang limitahan sa 15,000 ang populasyon sa bawat barangay sa bansa.
Ayon kay Surigao Del Norte 2nd District Rep. Robert Ace Barbers, layon nito na mabigyang pagkakataon ang mga opisyal ng barangay na mapamunuan ang kani-kanilang nasasakupan sa mas epektibong paraan.
Sa panayam ng DWIZ kay Barbers, sinabi nito na oras na maamiyendahan ang local government code hinggil sa komposisyon ng barangay, sesertipikahan naman ito ng Philippine Statistics Authority (PSA).
Naniniwala ang mambabatas na sa ganitong paraan ay madaling makadadaloy ang tulong mula sa national government sa tuwing may sakuna o pandemya.
Kapag ka merong mga national natural calamities o man made calamities, or mga national emergencies kagay nitong ngayong pandemic, napakahirap i-manage o i-implement yung programa ng national government kaparehas nung pagbibigay ng ayuda so, siguro dapat liitan natin,” ani Barbers.
Sakaling makalusot at maging batas, sinabi ni Barbers na asahang madaragdagan pa ang mga barangay sa bansa subalit mababawasan naman ang mga opisyal nito.
Magke-create tayo ng mga bagong barangay, yung mga existing na mga barangay ay liliit naman ang mga barangay officials, siguro 8, isang barangay kapitan, 8 barangay kagawad, isang barangay treasurer, isang barangay secretary, isang barangay SK, so 11 halos 11 bawat barangay, ngayon kung liliitan natin yug population, siguro per barangay hindi na kailangan ng 8 kagawad diba? SIguro maaring 3 na lang, for every 5,000 population is isang kagawad”, ani Barbers. — panayam sa Todong Nationwide Talakayan.