Magpapatupad ang Metropolitan Manila Development Authority ng pansamantalang lane closure at stop-and-go traffic scheme kaugnay ng ika-limampu’t isang Metro Manila Film Festival Grand Parade of Stars sa Biyernes, Disyembre a-disinuwebe, sa Makati City.
Nabatid na host city ang Makati sa parada na inaasahang daragsain ng mga manonood upang masilayan ang mga artista sakay ng makukulay na float ng mga pelikulang kasali sa MMFF.
Ayon sa MMDA, ipatutupad ang mga traffic adjustment mula alas-dose-y-uno ng tanghali hanggang alas-diyes ng gabi sa ilang pangunahing kalsada, kabilang ang Macapagal Boulevard, Gil Puyat Avenue, Ayala Avenue, Makati Avenue, J.P. Rizal Street, at A. Reyes Avenue, kung saan dadaan ang parada bago ito magtapos sa isang meet-and-greet at programa sa Circuit Makati.
Pansamantalang ihihinto ang daloy ng trapiko sa mga piling lane upang makadaan ang parada, at agad ding ibabalik ang daloy matapos itong makadaan.
Magde-deploy naman ang MMDA ng mahigit isanglibong tauhan mula sa iba’t ibang unit para sa pamamahala ng trapiko at seguridad.
Pinaalalahanan naman ang mga motorista na magplano ng biyahe at gumamit ng alternatibong ruta dahil tinatayang tatagal ang nasabing parada ng mahigit isa’t kalahating oras, at sasaklaw ng 8.4 kilometro.
