Bukas si Pangulong Ferdinand Marcos Jr. sa paggamit ng United Nations Convention Against Corruption upang matunton at maaresto ang dating mambabatas na ngayo’y pugante na si Zaldy Co.
Ito’y sa harap ng kasong graft at malversation na kinakaharap ng dating kongresista kaugnay sa maanomalyang flood control projects.
Sinabi ni Presidential Communications Undersecretary Claire Castro na maaaring pag-aralan ang paggamit ng UNCAC ngunit nakadepende pa rin sa mga batas ng bawat bansa ang pagpapatupad ng kasunduan.
Nilinaw ni Usec. Castro na ayon sa Department of Justice, wala pang aktibong koordinasyon ang Pilipinas sa United Nations kaugnay sa UNCAC.
Kaugnay nito, iminungkahi rin ni Senate President Pro Tempore Panfilo Lacson ang paggamit ng kasunduan dahil mas magiging madali anya ang paghahanap kay Co kung magagamit ang mga mekanismo ng UNCAC na kinabibilangan ng mahigit isandaang bansa.
Ipinaliwanag ng senador na sa ilalim ng Article 38 ng kasunduan, na inaprubahan noong 2003 at ni-ratify ng Senado ng Pilipinas noong 2006, inaatasan ang mga state parties na magtulungan sa imbestigasyon at pag-uusig ng mga kasong kriminal.
