Itinanggi ng pamunuan ng Armed Forces of the Philippines o AFP na may ipinatutupad na news blackout hinggil sa isinasagawang opensiba ng militar laban sa bandidong Abu Sayyaf.
Binigyang diin ni AFP Spokesman Brig.Gen. Restituto Padilla, hindi kasi ligtas para sa mga mamamahayag ang mag-cover ngayon sa Basilan dahil nagpapatuloy pa rin ang kanilang operasyon laban sa mga bandido.
Dahil dito, umapela si Padilla sa media na iwasan muna ang pagco-cover sa Basilan sa halip, makabubuti na lamang kumuha ng impormasyon sa headquarters ng Western Mindanao Command sa Zamboanga City.
Kasunod nito, umaasa si Padilla na mauunawaan ng mga mamamahayag ang kanilang apela dahil para na rin ito sa kanilang kaligtasan at seguridad.
General honours
Bibigyan naman ng general honours at vigil ng Armed Forces of the Philippines o AFP ang 18 sundalong nasawi sa bakbakan sa Tipo-Tipo, Basilan.
Ayon kay AFP Public Affairs Office Chief Col. Noel Detoyato, napagpasyahang huwag nang dalhin pa ng maynila ang labi ng mga nasawing sundalo dahil pawang mga Muslim at taga-Mindanao naman ang mga ito.
Dahil dito, sinabi ni Detoyato na gagawin ang nasabing parangal sa pinakamalapit na army unit matapos kunin ng kani-kanilang pamilya ang labi ng mga nasawing sundalo.
Batay kasi aniya sa tradisyon ng relihiyong Islam, dapat mailibing agad ang isang bangkay bago pa man lumubog ang araw.
By Jaymark Dagala