Handang-handa na ang National Capital Region Police Office o NCRPO para sa pagsisimula ng election period bukas, Abril 14.
Sa panayam ng DWIZ, sinabi ni NCRPO Chief Director Oscar Albayalde na nasa mahigit labin limang libong (15,000) pulis ang kanilang ipapakalat sa mahigit pitongdaang (700) polling centers sa Metro Manila.
Bukod pa aniya ito sa puwersa na manggagaling naman sa Armed Forces of the Philippines o AFP.
Dahil kasabay ng election period ang pag-iral ng Comelec gun ban, sinabi ni Albayalde na asahan na rin ang mga malawakang Comelec checkpoint.
“Handang-handa na po ang ating Kapulisan natin dito hindi lang po kami pati ‘yung ating joint task force ng NCR with the Armed Forces of the Philippines.” Ani Albayalde
Kasabay nito, nagpaalala naman si Albayalde sa mga motorista kaugnay ng mga inilatag na checkpoint ng PNP.
Kabilang dito ang pagdahandahan at paghinto sa mga checkpoint. Buksan ang bintana ng sasakyan at ilaw sa loob ng sasakyan para sa inspeksyon.
“Pinapaalalahanan natin ang ating Kapulisan at ang ating mga kababayan na hindi po puwedeng ipasok ang anumang bahagi ng katawan ng pulis sa loob ng sasakyan, hindi rin po puwedeng mabuksan kahit anong parte ng sasakyan dahil sinusunod natin ang plain view doctrine diyan.” Pahayag ni Albayalde
(Ratsada Balita Interview)