Iniimbestigahan na ng AFP o Armed Forces of the Philippines ang nangyaring pananambang sa sinasakyang helicopter ni Maguindanao Governor Esmael Toto Mangudadatu.
Inihayag sa DWIZ ni AFP Spokesman Brigadier General Restituto Padilla, bagama’t may hawak nang impormasyon si Governor Mangudadatu hinggil sa kung sino ang nasa likod ng pananambang, hindi muna nila ito isasapubliko hangga’t hindi pa natatapos ang imbestigasyon.
Gayunman, sinabi ni Padilla na hindi pa nila batid kung may kinalaman sa pulitika o trabaho bilang gobernador ang nasabing pag-atake.
“Merong nagpaputok sa kanyang lulan na helicopter at may nagsasabi nga na muntik na siyang tinamaan, ang pakiwari nila ay siya talaga ang puntirya at maaaring sniper fire ito na target siya, tinamaan ng isang beses ang chopper. Hindi pa namin batid kung kaugnay ito sa politics kasi may iba-iba din silang kaaway sa pulitiko at ibang bagay, sa kanilang ipinatutupad na reporma sa kanilang lugar, maaaring mga grupo ito na nasagasaan nila na nagalit.” Pahayag ni Padilla
Matatandaang Sabado ng umaga nang paputukan ang chopper kung saan lulan si Mangudadatu at kapatid nito habang papunta sa 6th Infantry Division headquarters para sana magsalita sa closing program ng isang Youth Summit.
Una nang lumabas ang ulat na mga miyembro umano ng BIFF o Bangsamoro Islamic Freedom Fighters ang mga umatake sa gobernador.
By Jaymark Dagala | Balitang Todong Lakas (Interview)