Magpapatawag ng pagdinig si Senator Grace Poe, Chairperson ng Senate Committee on Public Order ukol sa kakulangan ng supply ng tubig.
Iimbitahan sa hearing ang Metropolitan Water and Sewerage System, gayundin ang Water Concessionaires na Maynilad at Manila Water.
Ayon kay Senator Poe, hihingan niya ng plano ang MWSS at ang dalawang Water Concessionaires kaugnay sa pagtugon sa kakapusan ng tubig dahil aniya hindi makatwiran na laging solusyon ang pagrarasyon ng tubig.
Dapat din aniyang makapaglatag ang mga ito ng pangmatagalang plano kaugnay sa krisis sa tubig at El Niño.
Tahasan pang sinabi ni Sen. Poe na tila ‘inutil’ ang MWSS dahil hindi nito napaghandaan ang nararanasan ngayong krisis sa tubig.
Ang ipapatawag na pagdinig sa pagbabalik ng sesyon ay magiging bahagi rin ng pagtalakay sa paglikha ng Department of Water Resources.
Iginiit ng senador na kailangan ang naturang departamento para mapag-isa ang tatlumpung ahensya ng gobyerno na kanya-kanya ang pangangasiwa sa suplay at distribusyon ng tubig. – sa ulat mula kay Cely Ortega-Bueno (Patrol 19).