Hindi muna maghihigpit ang Metropolitan Manila Development Authority (MMDA) sa mga street at sidewalk vendor.
Ayon kay MMDA Chairman Benhur Abalos, ito ay upang makabawi naman ang mga vendor mula sa epekto ng pandemya.
Kaugnay nito, ipinag-utos na ni Abalos na huwag kumpiskahin ang mga paninda ng mga vendor ngayong papalapit ang kapaskuhan.
Sisitahin lamang ang mga mahuhuling vendor sa unang paglabag, ngunit aniya sa ikalawa at ikatlong paglabag ay hindi na ito pagbibigyan ng MMDA.
Hinimok rin ni Abalos ang mga vendor na makipag-ugnayan sa mga lokal na pamahalaan at sa MMDA upang malaman kung saan sila maaaring magbenta.—sa panulat ni Hya Ludivico
