Nireskyu ng mga tauhan ng Philippine Coast Guard (PCG) ang mga residenteng natrap sa kani-kanilang mga bahay dahil sa pagbaha bunsod ng pananalasa ng bagyong Agaton.
Kabilang sa mga sinagip ang mga residente sa mga bayan ng Ajuy, Banate, Balasan, Concepcion, Dingle at Passi na ngayon ay nananatili sa mga evacuation center.
Tumulong narin ang Philippine Rescue Volunteers sa PCG para iligtas ang mga residente sa lugar.
Ayon kay Iloilo PDRRMO Chief Jerry Bionat, nasira ang ilang mga tulay at pananim sa dalawampung bayan sa Iloilo kabilang na ang mga nabanggit na bayan.
Sa ngayon, isa na ang naitalang nasawi habang isa naman ang nawawala at patuloy pang pinaghahanap ng mga otoridad. —sa panulat ni Angelica Doctolero
