Binulabog ng pagsabog ang mga residente malapit sa isang State University sa bayan ng Arakan sa North Cotabato kaninang madaling araw.
Ayon kay Senior Inspector Argie Celeste, hepe ng Arakan Philippine National Police (PNP), may naghagis umano ng hindi pa tukoy na pampasabog malapit sa likurang gate ng Cotabato Foundation College of Science and Technology sa Barangay Doroloman.
Masuwerte namang walang nasaktan sa pangyayari ayon kay Celeste bagama’t nagkalat aniya ang shrapnel at debris sa lugar na pinangyarihan ng pagsabog.
Giit ni Celeste, pananakot lamang at hindi pananakit ang layunin ng nasabing pagpapasabog na itinapat pa sa ika-50 anibersaryo ng pagkakatatag ng naturang pamantasan.
