Pinaiimbestigahan na ni Philippine National Police (PNP) chief General Archie Gamboa ang ulat na kabilang sa 17 operators ng ilegal na sugal ang isang nagpakilalang kamag-anak umano ni CALABARZON Regional Police Office Director Gen. Vicente Danao.
Ayon kay Gamboa, dapat linisin ng mga regional director ang kanilang mga nasasakupan at huwag nang hintayin pang mismong ang mga unit mula sa Kampo Crame ang kumilos laban dito.
Dapat aniyang tukuyin ng mga regional directors ang listahan ng operator at protektor ng illegal gambling sa kani-kanilang mga nasasakupan.
Magugunitang nasa 17 katao ang naaresto ng Philippine National Police-Criminal Investigation and Detection Group (PNP-CIDG) sa isinagawang raid sa dalawang bolahan ng jueteng sa bahagi ng Tagaytay, Mendez at Alfonso sa Cavite sa ilalim ng “Oplan Bulilyo” noong nakaraang linggo. —ulat mula kay Jaymark Dagala (Patrol 9)
