Tumaas ang bilang ng mga Pilipino na nangangailangan ng mental health counseling sa gitna ng pag-iral ng lockdown bunsod ng coronavirus disease 2019 (COVID-19) pandemic.
Ayon kay Dr. Bernard Argamosa, isang psychiatrist sa National Center for Mental Health (NCMH), naglalaro sa 953 na tawag kada buwan mula Marso hanggang Mayo ang natatanggap ng kanilang crisis hotline.
Higit na mataas ito kumpara sa 400 kada buwan mula noong Mayo ng taong 2019 hanggang Pebrero ng kasalukuyang taon.
Sinabi ni Argamosa na nakatatanggap din sila ng nasa 45 suicide-related calls kada buwan.
Karamihan umano sa mga tumatawag ay dahil sa nararanasang anxiety.
Kaugnay nito, nagpaalala si Argamosa na mahalaga na mapanatili ang magandang kondisyon ng ating mga pag-iisip lalo na sa panahon ngayon kung saan may kinakaharap na pandemya.
