Hinimok ni NAPOLCOM o National Police Commission Vice Chairman at Executive Officer Rogelio Casurao ang lahat ng miyembro ng PNP o Philippine National Police na manatiling tapat sa kanilang mga tungkulin.
Ito ang naging sentro ng mensahe ni Casurao sa kanyang pagdalo sa alumni homecoming ng PNPA o Philippine National Police Academy sa silang cavite kahapon.
Ayon kay Casurao, malaking hamon sa PNP ang pagkakasangkot ng kanilang mga miyembro sa ilang mga iligal na gawain tulad ng pangingikil at kalakalan ng iligal na droga.
Kasabay nito, pinapurihan naman ni Casurao ang mga ginagawang pagsisikap ng liderato ng PNP para malinis ang kanilang hanay mula sa mga tiwaling pulis.
Kahapon, masayang nagsama-sama ang mga miyembro ng PNPA Alumni Association mula Sa Maharlika Class of 1980 hanggang Maragtas Class of 2018.
Sinabi ni Casurao dapat ginagamit ang nasabing mga okasyon para mas palalimin pa ang samahan ng alumni.
Kasabay ng pagdiriwang ng PNP Alumni Homecoming nanumpa ang kanilang mahigit 100 adaptive members kabilang si Director Guillermo Eleazar ng PMA class of 1987.