Bumuhos ang emosyon ng mga estudyante ng University of Rizal System – Binangonan nang salubungin nila ang labi ng kanilang campus director na si Professor Jonathan Peñada at Sports Director na si Professor Elmer Dacillo.
Nasawi ang dalawa makaraang mahulog sa bangin ang kanilang sinasakyang bus sa bayan ng San Jose, Occidental Mindoro, noong sabado ng gabi.
Ayon sa mga nakaligtas, tumayo sina Peñada at Dacillo nang i-anunsyo ng driver ng Charms Aloha Travel Bus na nawalan ng preno ang sasakyan upang alalayan at pakalmahin ang mga estudyante.
Kung hindi umano dahil sa dalawa ay mas maraming marami anilang namatay sa trahedya.
Naka-half mast na ang watawat ng paaralan at nag-alay din ng bulaklak, kandila at dasal ang mga estudyante at guro para sa dalawang biktima.
Samantala, patuloy na pinaghahanap ang driver ng bus na si Julius Beleno na nahaharap sa reklamong reckless imprudence resulting in multiple homicide at multiple physical injury.
