Umapela ang Department of Health sa lahat ng kandidato sa may 9 elections na magsilbing “role model” o mabuting halimbawa ngayong panahon ng kampanya.
Ito’y sa pamamagitan ng pagsunod sa health protocols sa gitna ng COVID-19 pandemic.
Aminado si health undersecretary Maria Rosario Vergeire na nakababahala ang ilang campaign activity nitong mga nakalipas na araw dahil sa pagdagsa ng maraming tao.
Dahil dito, ipinaalala ni Vergeire sa publiko, lalo sa mga dumadalo sa political events, na nananatili sa bansa ang COVID-19 at mga variant nito kaya’t dapat mag-ingat at sumunod sa health protocols.
Dapat din anyang ang mga kandidato na mismo ang unang tumatalima sa mga patakaran upang pamarisan din ng publiko at maiwasan ang hawaan ng COVID-19.
