Lumutang na ang may–ari ng Dimple Star Bus sa headquarters ng Philippine National Police (PNP) sa Kampo Crame kagabi.
Bago ito ay iniutos ni Pangulong Duterte sa kanyang ginawang pagbisita kahapon sa Occidental Mindoro ang pag papaaresto sa operator at may–ari ng nasabing bus unit.
Ayon kay Atty. Rene Grapilon, legal counsel ng Dimple Star, hindi sumuko ang kanyang kliyente kundi inimbitahan lamang ito ng Criminal Investigation and Detection Group (CIDG).
Dagdag pa ni Grapilon, hindi naman ginusto ng sinuman lalo na ng pamunuan ng Dimple Star ang nangyaring trahedya.
Maliban sa may–ari ng Dimple Star ay ipinaaaresto na rin ni Pangulong Duterte ang lahat ng operator at driver ng mga colorum na bus sa buong bansa.
Buong fleet ng Dimple Star Bus sinuspinde ng LTFRB
Pinagbawalan munang makabiyahe ng Land Transportation Franchising and Regulatory Board (LTFRB) ang buong fleet o ang 118 units ng Dimple Star bus kasunod nang nangyaring insidente sa Occidental Mindoro na ikinasawi ng 19 katao.
Ayon kay LTFRB Chairman Martin Delgra, hindi makakabiyahe ang lahat ng bus ng Dimple Star sa loob ng 30 araw habang nagpapatuloy ang kanilang imbestigasyon.
Lumalabas aniya sa kanilang isinagawang pagsusuri na maraming depekto ang mga bus unit ng nasabing kumpanya.
Sinabi pa ni Delgra, batay sa kanilang datos mula nuong 2011 ay aabot na sa 134 ang nasugatan habang 25 na ang nasawi sa mga aksidente na kinasasangkutan ng mga unit ng Dimple Star.
—-