Wala nang pangangailangan pa upang muling palawigin ang pag-iral ng batas militar o martial law sa Mindanao kahit limitahan pa ito sa ilang mga lugar doon.
Iyan ang pananaw ni retired Supreme Court Associate Justice Francis Jardeleza makaraang isulong ng militar na gawing limitado na lamang sa mga lugar kung saan may presensya ng mga lawless elements ipatupad ang martial law.
Sa isang forum sa Quezon City kahapon, sinabi ni Jardeleza na kailangang patunayan ng Department of National Defense (DND) at Armed Forces of the Philippines (AFP) na may matinding pangangailangan pa rin upang i-extend ang martial law dahil nakabatay dito ang magiging pasya ng mga mahistrado.
Magugunitang bumoto si Jardeleza pabor sa idineklarang martial law sa Mindanao noong 2017 matapos ang Marawi Siege subalit tinutulan na niya ito nang palawigin ng pamahalaan sa nakalipas na dalawang taon.
Si Jardeleza ay tuluyan nang nagretiro sa serbisyo bilang mahistrado ng korte suprema noong Setyembre 26.