Kitang-kita sa mga drone shots na napuno ang iba’t ibang kalsada sa Mandaluyong ng libu-libong mga tagasuporta ng BBM-Sara UniTeam na dumalo sa kanilang grand rally noong Peb. 13, 2022.
Kapwa mga nakasuot ng pulang damit at may winawagayway na maliliit na mga bandila ng Pilipinas ang mga taga-suporta na sa malapitang tingin ay sumunod naman sa mga health protocols sa pagtitipon.
Pinangunahan ni dating Mayor at MMDA Chairman Atty. Benjamin “Benhur” Abalos Jr. ang mga taga-Mandaluyong sa pagpapakita ng suporta sa tambalan nina Presidential candidate Ferdinand “Bongbong” Marcos, Jr. at Vice-presidential candidate Sara Duterte-Carpio.
“Matalino”, “pinakamagaling” at “higit sa lahat may puso” ang mga katangiang binanggit ni Abalos sa pagpapakilala kay Marcos, Jr.
“May 5, 2016 halos six years ago sa lugar na ito…Tumakbo siya [Marcos Jr.]. Ano ang binigay na boto ng Mandaluyong? Dumadagundong, nanalo, nanalo sa Mandaluyong at nanalo sa Kalakhang Maynila,” sabi ni Abalos.
“Kaya naman ngayon ay mas maraming pa tayo!” dagdag ni Abalos bago ipakilala si Marcos Jr. at ipinakilala ito bilang susunod na Presidente ng Pilipinas.
“Kami po ni Inday Sara ay may adhikaing pagkakaisa kaya naman po kami ay tinatawag na UniTeam dahil unity po ang aming pangarap para sa sambayanang Pilipino,” paliwanag ni Marcos Jr.
Kasabay nito, inilatag ni Marcos Jr. ang kanyang iba’t ibang plataporma para sa bansa.
Nabatid na dumalo rin sa grand rally ang mga senador na tumatakbo sa ilalim ng UniTeam slate pati na rin si Toni Gonzaga na kumanta ng “Eye of the Tiger” alinsunod sa bansag kay Marcos Jr. na “tigre ng Norte”.
Humigit-kumulang sa 240,000 ang mga rehistradong botante sa Mandaluyong.
