Bukas ang Malacañang sa posibleng pagtanggap ng ibang bansa kay dating Pangulong Rodrigo Duterte sakaling pagbigyan ng International Criminal Court ang hirit nitong interim release.
Ayon kay Palace Press Officer at Communications Usec. Claire Castro, maituturing na “good news” para sa kampo ng dating Pangulo kung totoo ngang may bansa nang handang kumupkop kay Duterte, at kung aaprubahan ng ICC ang hirit na pansamantalang paglaya.
Kasunod ito ng anunsyo ni Vice President Sara Duterte na may isang bansa nang handang kumupkop sa kanyang ama, kapag pumabor ang ICC sa kanilang petisyon.
Sinabi ni Usec. Castro na posibleng bunga ito ng madalas na pagbibiyahe ng Bise Presidente sa labas ng bansa.
Nitong buwan lamang, muling naghain ng request ang kampo ni Duterte sa ICC Pre-Trial Chamber para aksyunan ang kanilang petisyon para sa interim release.
— sa panulat ni John Riz Calata
