“Bull’s eye” para kay House Trial Spokesperson Zia Alonto Adiong ang mga ebidensiyang inilatag ng prosecution sa impeachment trial laban kay Vice President Sara Duterte.
Ito’y matapos humarap sa paglilitis si Securities and Exchange Commission Company Research and Monitoring Department Director Atty. Gerardo Del Rosario para patunayan sa direct examination ang mga nilabag ng Bise Presidente.
Ayon kay Adiong, malinaw na lumabag sa Konstitusyon si VP Sara kung saan, lumitaw sa mga dokumento at testimonya ni Del Rosario na may posisyon at shares umano ang Bise Presidente sa ilang kumpanya habang nanunungkulan sa gobyerno mula 2022 hanggang 2025.
Iginiit ni Adiong, paglabag ito sa Article VII, Section 13 ng Saligang-Batas na nagbabawal sa Pangulo, Bise Presidente at mga miyembro ng Gabinete na magkaroon ng ibang propesyon, makibahagi sa negosyo o magkaroon ng pinansyal na interes sa mga kontratang konektado sa gobyerno.
Pagdidiin ni Adiong, “bull’s eye” ang mga paglabag ni VP Sara sa Konstitusyon.
