Mas humaba pa ang pila ng mga pasahero kaninang umaga sa Caloocan City para makasakay ng libre sa EDSA bus carousel.
Ayon sa report ang nasabing pila ng mga pasahero ay umabot ng footbridge na nagko-konekta sa Southbound EDSA busway carousel lane hanggang Benin Street sa Monumento.
Nabatid na alas-4 pa lamang ng madaling araw ay nagsimula nang humaba ang pila ng mga pasahero at makalipas ang dalawang oras at kalahati ay umabot na sa kalagitnaan ng Benin street sa tapat mismo ng EDSA.
Maraming pasahero ang nagsabing mas gusto nilang sumakay sa EDSA busway carousel kaysa gamitin ang kanilang mga sasakyan dahil sa mataas na presyo ng langis.
Natutuwa ang mga pasahero dahil bukod sa libre at airconditioned ang mga bus sa EDSA carousel malaking bagay ang tuloy-tuloy na biyahe nito kasunod ng dedicated lane para rito.
Ang libreng-sakay ng EDSA busway carousel ay nagsimula noong April 11 sa ilalim ng ikatlong yugto ng service contracting program ng Department of Transportation (DOTR).
