Ginamit na pambili ng pagkain at pambayad-utang ng mga benepisyaryo ng Social Amelioration Program (SAP) ang natanggap nilang pinansiyal na ayuda mula sa gobyerno.
Batay ito sa isinagawang pag-aaral ng Department of Social Welfare and Development (DSWD) katuwang ang United Nations World Food Program (UN-WFP)
Ayon sa DSWD, 92% ng kanilang respondents na SAP beneficiaries ang nagsabi na pinambili nila ng pagkain ang nakuha nilang pinansyal na ayuda sa ilalim ng SAP.
Habang 58% naman ang nagsabing ginamit nito ang SAP payout bilang pambayad ng kanilang utang.
Anila, bagama’t prayoridad ng halos lahat ng mga benepisyaryo ng SAP ang pagkain, malaking porsyento pa rin ang ginamit ang kanilang ayuda para sa pagbabayad ng mga utang.
Dahil dito, sinabi ni DSWD Secretary Rolando Bautista na pinatunayan ng pag-aaral na nakamit nila ang tunay na layunin ng SAP bilang bagong istratehiya upang makabangon mula sa krisis ang mga pinakamahihirap na Pilipino.