Lumagpas sa runway ng Mactan International Airport ang landing gear ng isang eroplano ng Cebu Pacific bago ito magtake-off.
Dahil dito, kinailangang pababain ang apatnaraan at tatlumpu’t limang (435) pasahero upang mahila ang eroplano.
Ayon sa Cebu Pacific, ligtas namang lahat ang mahigit 400 pasahero ng flight 5J-570 na kinabibilangan ng tatlong sanggol.
Patungo sanang Maynila ang eroplano nang maganap ang naturang minor accident.
Sa ngayon ay balik na sa normal na operasyon ang Mactan Cebu International Airport.
Matapos na itabi ang naaberyang eroplano ay nagawa nang muling magamit ang runway ng iba pang mga eroplanong lumalapag at umaalis sa naturang paliparan.
Samantala, dumating na sa lugar ang ipinadalang kapalit na eroplano ng Cebu Pacific para sumundo sa mga naabalang pasahero.
By Ralph Obina / Rianne Briones
